Oplan Kaluluwa ipatuman pagbantay sa mga biyahedor

CEBU, Philippines - Ang Philippine Coast Guard (PCG) inubanan sa Philippine Ports Authority (PPA), Maritime Authority (MARINA), Government Organization (GO) ug Non-Government Organization (NGO) mopahigayon og DOTC OPLAN Kaluluwa Passengers Assistance Centers karong umaabot nga Oktubre 30 hangtod Nobiyembre 3 ning tuiga sa mga nagkadaiyang lugar nga dangpanan sa mga pasahero sa Rehiyon 7 ug 8 sa umaabot nga kasaulogan sa adlaw sa mga patay ug kalag.

Matud pa ni Michell V. Ursabia, public information officer sa PCG sa Central Visayas nga ang help desk (HD) nga ilang mugnaon unya maoy mohatag og serbisyo sama sa pagdawat og mga reklamo sa mga pasahero nga sumasakay sa mga sakyanang pangdagat ug medical assistance alang unya sa mga nagkinahanglan og tabang medical.

Dugang pa niya nga ang HD maoy magsilbing usa ka “facilitator” sa mga hangyo unya sa katawhan kabahin sa mga sakyanan sa kadagatan ug sila nay mopaabot niini ngadto sa opisina o sa operator sa maong barko.

Ang PCG nagsugod sa ilang pagpangandam niadto pang Oktubre 21 ning tuiga alang sa pagtubag unya sa bisan unsang kakuli-an nga moabot sa umaabot nga holiday.

Sa pagmugna sa HD alang sa mga mobiyahiay nga mosakay og sakyanan sa kadagatan bukas kini kanunay sulod sa 24 oras ug bantayan kini sa taga MARINA, PPA ug PCG inubanan sa Philippine Coast Guard Auxilliary (PCGA) ug ubang mga volunteers.

Alang sa mga dugang nga kasayuran ang publiko mahimong mokontak sa local PCG Hotline (32) 316-6566 ug sa cell number 09296864123.  - Lesley Caminade (BANAT NEWS)