Cebu Doc hospital, university kuhaon gyud sa City Hall

CEBU, Philippines - Determinado si Mayor Tomas Osmeña nga kuhaon sa kagamhanan sa dakbayan ang Cebu Doctors’ Hospital (CDH) ingon man ang Cebu Doctors’ University (CDU).

Kini tungod usab sa pagdumili sa tag-iya ug tagdumala niini pagbayad sa buluhisan niini nga giingong mokapin na sa usa ka gatos ka milyon ka pesos.

Matud sa mayor nga gikapoy na siya og pinaabot sa kaandam sa siyudad pagpakigsabot-sabot sa management sa CDH ug CDU nga walay nahimong resulta.

Nasayran nga ang City Treasurer’s Office mipadala na og final demand letter sa nahisgutang duha ka institusyon niadtong miaging Biyernes.

Matud pa ni City Treasurer Ofelia Oliva nga ila lang gihatagan kutob karong umaabot usab nga Biyernes ang CDH ug CDU pagbayad sa ilang obligasyon.

Kini aron dili pugngan sa kagamhanan sa dakbayan ang maong mga institusyon nga moresulta unya sa pag-angkon sa City government niini.

Nagkanayon si Osmeña nga nagmagahi ang CDH ug CDU paghatag sa gipangayo sa siyudad hinungdan nga kini ilang tinud-on.

“We’re going to sell all their properties and we are going to garnish their funds in the bank, we let our lawyers handle that,” sumala pa ni Osmeña.

Kahinumduman nga niadtong tuig 2007, ang CDH, CDU uban sa Southwestern University, Sacred Hospital, Cebu Institute of Technology, Cebu North General Hospital ug Velez General Hospital nipasaka og civil case batok sa siyudad sa tinguha nga inulo sa korte ang ordinansa nga gibasihan sa kagamhanan sa dakbayan pagkolekta kanila og buhis.

Ang nahisgutang tax ordinance nag-reclassify sa nahisgutang proprietary schools ug hospitals nga service-oriented ug giisip kining taxable industries.

Matud pa ni Osmeña nga ang ubang mga proprietary schools ug hospitals isunod unya sa CDH ug CDU pagsakmit kung dili usab mobayad sa ilang buluhisan.

“They will follow ... you at hit one point first di ba? Don’t attack everybody, get one, sample,” dugang pamahayag ni Osmeña. (Elly Bolonos)       (BANATNEWS)