Motor vs motor; 1 patay

CEBU, Philippines - Usa ang patay ug usa ang angol sa panagbangga sa duha ka motorsiklo sa sitio Tan-awan barangay Guadalupe lungsod sa Carcar niadtong Huwebes sa alas 8:00 sa buntag.

Ang namatay mao ang drayber sa motorsiklo nga si Antonio Cambujan, 64, samtang naangol ang drayber sa laing motorsiklo nga si Ronilo Caballero, 21, molupyo sa sitio Tapal barangay Guadalupe.

Matud pa ni PO1 Gilmer Noval sa Carcar Police dihang nahinabi sa Banat News ang duha ka motorsiklo pulos gikan sa managlahi nga direksyon, si Caballero gikan sa sitio Sangi Guadalupe paingon sa Tapal samtang si Cambujan gikan sa Mantalongon paingon sa Poblacion Carcar.

Subay sa imbestigasyon pag-abot sa maong lugar si Cambujan ni-overtake og sakyanan hinungdan nga nikawat sa pikas linya apan nakasampok niini ang motor ni Caballero.

Pulos nalabay ang duha ka drayber ug nabunal sa semento nga karsada ug daling gitabang sa mga estambay sa maong lugar ug gihatud sa Carcar District Hospital apan gideklarar nga dead on arrival si Cambujan. – BANAT NEWS