Ginang gipatay

CEBU, Philippines - Patay ang usa ka ginang human gipusil samtang gikan naghatod og sud-an sa iyang silingan sa Spring Village, barangay Pakigne, lungsod sa Minglanilla niadtong miaging Martes sa hapon. Si Anne Mae Sodaria, 40, minyo, ug residente sa nahisgutang lugar nahagba sa yuta sa dihang paingon nang mogawas sa gate sa iyang silingang si Leizel Bangtang nga iyang gihatdan og sud-an.

Matud pa ni PO2 Avelino Seloria sa Minglanilla Police Station sa dihang nahinabi sa Banat News nga daling nakasibat ang wala mailhing mamumuno.

Si Sodaria daling gidala sa South General Hospital, tungod sa igo sa iyang walang bukton nga ang bala milahos sa lawas ug miungot sa tiyan apan gideklarar kini nga dead on arrival.

Nakakuha og usa ka slug sa bala ug duha ka kabhang sa kalibre .45 ang kapolisan sa Minglanilla. Si PO2 Seloria miingon nga ang bana sa biktima mitug-an sa mga imbestigador nga ang iyang asawa adunay gikakontra pipila na ka tuig ang nakalabay, apan nagdumili kini paghatag og detalye. Nasayran sa kapolisan nga usa na ka semana nga nag-monitor ang mamumuno sa biktima ug mao kini ang gitutokan sa mga imbestigador. – BANAT NEWS