CEBU, Philippines - Gipadayag ni Cebu City Acting Mayor Michael Rama ang iyang kabalaka subay sa pagpatuman sa computerized election sa sunod tuig nga piniliay tungod kay giingong wala pa makapahigayon og seminar o briefing ang Comelec labot sa automation ngadto sa posibleng mokandidato.
Alang kang Rama, karon ang tukmang panahon alang niini tungod kay sa sunod buwan mao na ang tingduso sa certifico de kandidatura.
Gihimo na hinuong kabahin sa hisgutanan ang poll automation sa gitakdang tigom sa mga bise mayor lukop nasod sa umaabot nga Disyembre.
Apan matud sa acting mayor nga ang Comelec maoy angayang mopasiugda niini tungod kay giingong ilang katungdanan ang pagpaila-ila sa bag-ong sistema.
Gitataw sa acting mayor nga duna siyay pagduha-duha sa poll automation tungod sa posibilidad nga dunay mahitabong kagubot sa nasod kung mapalpak ang pagpahigayon sa poll automation sunod tuig.
Kini ang hinungdan nga nanawagan ang acting mayor ngadto sa kadagkuan sa Comelec nga maoy gustong ipatuman ang maong sistema.
“That’s why I’m trying to bring this to the national leadership who are very much in a view of wanting this automation or are we expecting nightmare leading to something which we do not wish to happen again,” matud pa ni Rama. (Elly Bolonos) (BANATNEWS)