Giatngan gipatay

CEBU, Philippines - Patay ang usa ka 42-anyos nga lalaki human giatngan sa dalan ug gipusil makadaghang higayon samtang paingon na untang mopauli gikan mipalit og bugas sa Upper Cogon, Poblacion I lungsod sa Carcar niadtong Biyernes sa alas 9:00 sa gabii.

Ang biktima mao si David Molina, 42, molupyo sa nahisgutang lugar samtang ang suspek wala pa mailhi sa kapulisan sa paghimo ning balita.

Matud pa ni SPO1 Jorame Ranud, tanud sa Carcar police dihang nahinabi sa Banat News gikan nangumpra ang biktima ug paingon nang mopauli ug naglakaw daplin sa karsada.

Apan pag-abot sa nahisgutang lugar ang wala mailhing mamumuno giingong miatang kaniya ug gipusil sa ulo ug ubang bahin sa lawas ug pagkahuman daling miikyas ang responsable.

Ang mirespondeng mga polis wala makakita og ebidensya diha sa crime scene gawas lang sa bugas nga gisulod sa plastic bag ug groceries nga kinompra sa biktima. Gisuwayan og dala sa Carcar District Hospital ang biktima apan gideklarar sa mga doktor nga dead on arrival. Ang kapulisan padayon pa sa ilang imbestigasyon pagtumbok sa mamumuno ug sa motibo sanglit sagad sa mga molupyo sa maong lugar walay nahatag nga impormasyon kabahin sa suspek.   (Darrel Carumba)    (BANATNEWS)