CEBU, Philippines - Pasubmitiron na og affidavit sa Cebu City Planning Office (CPDO) ang tanang nangayo og fencing permit ug development permit sa City Hall nga dili niini igawas sa ilang luna ang yuta nga makuha gikan sa gihimo niining development partikular na sa mga quarrying operations.
Matud sa labaw sa CPDO nga si Engineer Nigel Paul Villarete, kini ilang himoon aron masiguro nga ang applicant mosubay sibo sa ilang gipangayo sa permit.
Kini tungod usab sa report nga nadawat sa kagamhanan sa dakbayan, nga quarry operation ang gihimo sa ubang nangayo og fencing ug development permit.
“Kung mo-quarry ka, go to the process, pero ang problema man gud kay lipaton ang city government, fencing ilang lukaton unya quarrying diay gihimo,” sumala ni Villarete.
Sa samang higayon miingon si Villarete nga ila usab nga susihon kadtong nahatagan na og permit kung kini wala ba makahimo og kalapasan ug kadtong masakpan mag-atubang unya og silot sibo sa nalatid sa Mining Ordinance sa dakbayan. Kini naglakip sa pagpamulta ug mahimo usab nga kanselahon ang permit, gawas sa pagpasaka og tukmang kaso ngadto sa hukmanan.
Una nang gimanduan ni acting mayor Michael Rama ang CPDO nga susihon ang tanang na-issue nga development permit sa City Hall tungod sa mga quarry operations nga nahitabo sa dakbayan.
Gusto sa acting mayor nga kanselahon gilayon ang na-issue nga permit sa siyudad kung ang na-isyuhan niini wala motamod sa ilang gipangayong permiso. – BANAT NEWS