CEBU, Philippines - Kritikal ang kahimtang sa usa ka drayber sa habal -habal human kini tabangi og dunggab sa tulo ka mga batan-on samtang nagpaabot og pasahero didto sa sitio Das Landing, barangay Lutopan, siyudad sa Toledo niadtong Lunes sa alas 6:00 sa gabii.
Ang biktima mao si Reynald Suarez, 19 , ulitawo, nga taga barangay Media Once, usa ka drayber sa habal- habal, samtang ang mga suspek mao sila si Redemto Pelaga, Jason Villarmia ug Yanyan Hermoso, pulos hingkod, nga taga barangay Daspo, Lotupan.
Si SPO3 Gil Lastimosa sa Toledo City Police mibutyag sa Banat News nga samtang nag-parking ug nagpupahuway ang biktima nga nagpaabot og pasahero, kalit lang giduol sa mga suspek ug giligid kini og dunggab pinaagi sa ilang mga kutsilyo hangtod nga natumba kini sa yuta ug sa pagtuo nga patay na ang maong biktima gibiyaan kini sa mga kriminal.
Ang mga kaubang drayber sa biktima mao nay mihatod kaniya sa South General Hospital sa lungsod sa Naga.
Ang kapulisan nagpadayon pa karon sa ilang manhunt operation batok sa mga suspetsado. - Darrel A. Carumba (BANAT NEWS)