'Kuyme' gibulit og bala patay

CEBU, Philippines - Gipusil-patay ang usa ka kuyme sa buwangan samtang naglingkod ug nagpahayahay sa lantay gawas sa iyang pinuy-anan sa barangay Tubod lungsod sa Sibonga kagahapon sa alas 12:23 sa sayong kaadlawon.

Ang biktima mao si Danilo Potestas, 40, molupyo sa nahisgutang lugar ug manguymi sa mga tari sa manok sa maong lugar samtang ang suspek pabiling wala pa mailhi sa kapulisan sa paghimo ning balita.

Matud pa ni PO3 Estanislao Chavez sa Sibonga Police dihang nahinabi sa Banat News ang biktima samtang migawas sa iyang balay ug naglingkod sa lantay sa gawas kalit lang gisekreto og duol sa suspek dayung pusil makadaghang higayon sa ulo.

Ang biktima nga wala makabantay nakaangkon og daghang pinusilan sa ulo ug kalawasan ug patay diha-diha nga wala na madala pa sa tambalanan samtang ang suspek daling nakasibat human sa hitabo.

Ang nirespondeng mga polis naka-recover og duha ka buhing bala sa crime scene ingon man upat ka kabhang sa kalibre .45, duha ka buhing bala, usa ka holster, tulo ka slugs sa mao gihapong kalibre.

Gisusi karon sa kapolisan ang report nga kanunay’ng armado ang biktima ug posibleng giilugan ra kini og armas ug maoy giunay og pusil kaniya. Sa paghimo ning balita gikatakda pang ipa-autopsy ang patay’ng lawas sa biktima sa usa sa mga punerarya sa maong lungsod ug nagpadayon sab ang gihimong imbestigasyon sa kapulisan pagtumbok sa mga suspek ug sa motibo sa krimen.   (BANATNEWS)