19 anyos gipusil naangol

CEBU, Philippines - Nalandig sa tambalanan ang usa ka 19-anyos nga lalaki human kini pusila niadtong Sabado sa kadlawon didto sa barangay Poblacion, dakbayan sa Talisay.

Ang biktima nga anaa karon sa tambalanan giila sa mga polis nga si Regin Juvesano, 19, nga taga sitio Dawis, barangay San Roque, samtang ang suspetsado mao si Raffy Bonjoc, 20, nga taga barangay Poblacion , pulos sa dakbayan sa Talisay.

Matud pa nila ni PO1 Roy Bacus ug PO1 Rex Gundaya , mga polis nga ubos sa Field Training Program (FPT) nga nadestino sa Talisay, nga nagsakay og traysikol ang biktima paingon sa ilang balay sa Dawis gikan sa Poblacion dihang samtang nagdagan ang traysikol nga gisakyan niini kalit lang siyang giluthang sa suspetsado.

Sila si PO1 Bacus ug PO1 Gundaya nga nagpatrolya sa maong lugar nga nakasaksi sa maong hitabo,maoy misikop dayon sa suspetsado, kinsa buot untang moikyas niadtong higayona.

Nasakmit usab nila ang .38 kalibre nga revolver sa suspetsado uban sa upat ka mga buhing bala niini ug usa ka kabhang.

Ang biktima kinsa nasabak sa dughan gihatod dayon ngadto sa Vicente Sotto Memorial Medical Center sa dakbayan sa Sugbo samtang ang suspetsado nagpahayahay karon sa prisohan ug nagpaabot sa tukmang kiha nga isang-at batok kaniya. (Brenda D. Batuto)   (BANATNEWS)