CEBU, Philippines - Tabangan sa mga barangay kapitan sa dakbayan sa Sugbu ang kapulisan sa siyudad sa gipatuman niining gun amnesty program.
Kini maoy gipasalig ni ABC president Eugenio Faelnar human usab masayod nga mosuroy na sa nagkadaiyang barangay sa dakbayan ang mga polis. Duha ka Kaoshiung bus maoy gamiton sa kapulisan pagsuroy sa kabarangayan ug maoy himoon niining mobile firearms depository.
Matud ni Faelnar nga iya nang giawhag ang mga barangay kapitan nga motabang sa mga polis pinaagi sa pagpakatap sa kasayoran labot sa maong programa.
Mas labaw'ng gihangop sa ABC president kung ang bus nga dalhon sa polis unang mosuroy diha sa ilang barangay sa Guadalupe.
Nasayran hinoon nga ang mobile firearms depository unang naka-schedule nga moduaw diha sa barangay Sambag 1.
Sama sa kapolisan nga nanawagan usab ang ABC president ngadto sa nanag-iya og armas sa dakbayan nga kini isurender sa mosuroy nga sakyanan.
Sa samang higayon giawhag usab ni Faelnar kadtong mga gun owners nga ni-expire na ang lisinsya sa ilang mga armas sa pagpa-renew niini ning higayuna. – BANAT NEWS