CEBU, Philippines - Dead-on-arrival sa tambalanan sa lungsod sa Bogo ang usa ka retiradong agriculturist human madasmag ang iyang motorsiklo ngadto sa usa ka trak nga gikargahag mga utanon niadtong milabay'ng buntag sa Poblacion, Tabogon.
Ang biktima giilang si Alfonso Millor, kapin sa 60 anyos, taga barangay Combado sa samang lungsod human mosampak ang iyang gimanihong motorsiklo sa Isuzu Elf nga trak nga gimaneho ni Alfredo Dosdos taga lungsod sa Borbon. Matud pa ni PO2 Josereden Hortelano sa Tabogon Police Station, gikan sa merkado ang biktima nga nangumpra ug padulong na mopauli apan pag-abot sa crossing sa Mabini ug Rizal Street barangay Poblacion wala kini maka-brake dihang naka-una’g sulod sa dalan ang maong trak. Maayong pagkasampak diha sa tuong kilid sa trak ang motorsiklo ug nalagpot ang biktima pipila ka metros ug nakaangkon og grabeng kadaot sa ulo ug patay nang naabot sa tambalanan. – BANAT NEWS