CEBU, Philippines - Gipasalig sa Cebu South Minibus Operators Association (CSMBOA) pagsilot sa mga driver niini nga molapas sa kasabutan tali sa kagamhanan sa lalawigan.
Gikatahong ubay-ubay gihapon sa mga minibus drivers ang mopasakay og mga pasahero sulod sa 300 metros nga gilay-on gikan sa Cebu South Bus Terminal.
Butang nga giangkon sa presidente sa CSMBOA nga si Julito Flores ug kini giingong iyang ipatawag karong hapon alang sa usa ka tigom.
“Naa koy initial report ana nga dunay mga minibus drivers nga naka-violate sa kasabutan ipatawag nako ni sila karong hapon,” sumala pa ni Flores.
Nagkanayon si Flores nga kung iyang matino nga dunay kamatuuran ang taho, dili unya magpanuko ang ilang grupo sa pagdisiplina sa mga driver.
Una nang gipadayag sa presidente sa CSMBOA nga ilang suspensuhon og pito ka adlaw ang driver nga makalapas sa kasabutan ug 15 ka adlaw sa ikaduhang higayon, ug 30 ka adlaw nga pagkasuspenso kung makalapas gihapon ang driver sa ikatulo ka higayon.
Pito ka driver lang hinuon ang nahibaw-an ni Flores nga padayong mopasakay og mga pasahero duol sa terminal ug maoy iyang ipatawag karong hapon.
Kini sukwahi sa gibutyag ni capitol consultant Byron Garcia nga moabot sa 156 ka mga minibus drivers ang nakalapas sa kasabutan.
Ang maong report ni Byron nakapakugang ni Flores tungod kay giingong 144 lang ka unit ang gipanag-iya sa mga sakop sa CSMBOA.
“Ambot lang kay 140 kapin ra man ka minibus ning ato, gipasubrahan man pud niya, siguro sab gabalik-balik tingali ang ubang driver,” matud pa ni Flores.
Subay niini giawhag sa presidente sa CSMBOA si Garcia pagduso sa listahan niini ngadto kaniya aron ilang madisiplina ang maong mga driver. – BANAT NEWS