Hepe gihulipan kay mibiya sa iyang pwesto

CEBU, Philippines - Hepe sa Dumanjug Police Station gipahulipan sa iyang katungdanan human mipauli sa ilang panimalay ug gibiyaan ang iyang mga sakop sa pag-imbestigar sa kamatayon sa usa ka American national nga si John Walter Zuke niadtong milabay’ng Biyernes.

Si Sr. Supt. Jesus Gaquing   nagkanayon nga gipahulipan na niya si Insp. Patrocinio Baylosis ni Sr. Insp. Arnulfo Lastimoso ang deputy sa Carcar Police Station ug si Baylosis maoy ibutang puli ni Lastimoso sa pwesto, deputy sa Cacar. Matud pa ni Gaquing nga tumong niyag tuyo nga si Lastimoso kinsa taga diha sa lugar maoy makapadayon sa imbestigasyon sa kaso tungod kay kabisado niini ang dapit.

Apan usa ka kasaligang tinubdan diha sa Cebu Provincial Police Office (CPPO) nagbutyag nga si Gaquing nasagmuyo sa gibuhat ni Baylosis kinsa misakay og bus pauli sa ilang panimalay bisan kun wala pa mahuman ang ilang imbestigasyon sa pag-ambush sa maong langyaw.

Si Gaquing nagpadala og mga makatabang nga imbestigador tungod sa pagkapatay kang Zuke apan walay hepe sa kapolisan sa maong lungsod nga naabtan ang grupo kay mipauli na sa ilang lungsod, butang nga dili gyud unta buhaton sa usa ka hepe.

Nagduda si Gaquing nga mga gun-for hire maoy mitipi kang Zuke ug usa sa motibong ilang gisubay mao ang love triangle.   (BANATNEWS)