CEBU, Philippines - Duha ang patay ug laing duha ang naangol, apil na ang 4-anyos nga bata, sa dihang giatngan ug gipamusil sa duha ka tawo nga nagtaptap sa nawong samtang gikan naghatod og lubong sa ilang paryente sa sementeryo sa barangay Poblacion, Sibonga niadtong Domingo sa hapon.
Ang mga namatay mao sila si Diosdado Montefalcon, 24, Arnold Soletario, 18, pulos molupyo sa barangay Tubod, Sibonga samtang ang mga naangol mao ang 17-anyos nga si Aljun Pallen ug napagan usab ang 4-anyos nga si Niño Alegado, anak og manindahay og kandila diha sa maong sam-ang.
Matud ni PO2 Joey Moreno sa Sibonga Police Station sa dihang nahinabi sa Banat News nga ang mga biktima naglakaw paingon sa ilang service nga trak de karga nga didto gi-parking sa merkado aron mamauli gikan nanglubong.
Nalabyan sa mga biktima ang duha ka mamumuno nga pulos nagtaptap og T-shirt sa ilang nawong sakay sa nag-parking apan nag-andar nga Honda Wave apan walay plate number ug pag-abot nila sa tungod gipamusil dayon kini makadaghang higayon.
Si Montefalcon ug Soletario nakaangkon og samad pinusilan sa dughan, ulo ug lainlaing bahin sa lawas ug namatay pipila ka gutlo, samtang si Pallen nakaangkon og samad pinusilan sa tuong bahin sa tuhod ug napagan usab ang 4-anyos nga anak sa manindahay og kandila nga naglingkod sa daplin ug naigo sa ubos nga bahin sa abaga ug gihatod sa tambalanan.
Matud ni PO2 Moreno ang namatay mao gyu'y target sa mga mamumuno ug napagan lang ang 17-anyos ug 4-anyos.
Nagdinaganay ang mga tawo human sa sunodsunod nga butobuto, samtang ang mga mamumuno nagdali sa pagsibat sakay sa motorsiklo. Ang miresponde nga mga polis naka-recover og lima ka kabhang sa bala sa kalibre .45. Ang mga polis nag-imbestigar sa hitabo. (BANATNEWS)