CEBU, Philippines - Nagpusok-pusok ang nagsingabot nga mga hinabang sa mga Sugbuanon sa nagkadaiyang mga drop-off booths sa dakbayan aron ipadala ngadto sa mga biktima sa bagyong Ondoy sa Luzon.
Padayong nanawagan si Cebu City Acting Mayor Michael Rama ngadto sa mga Sugbuanon nga motabang sa mga biktima sa baha didto sa kauluhan sa gilusad nga relief campaign sa dakbayan.
Gawas sa mga nagkadaiyang local government units ug mga ahensya sa gobiyerno sa Sugbu hasta ang mga non-government organizations ug ang Police Regional Office-7 milusad usab og susamang operasyon.
Ang Cebu City nagbutang og drop-in booth diha sa Fuente Osmeña samtang ang Department of Social Welfare and Development Regional Office 7 mi-activate sa ilang Quick Response Team aron makatigom ug makakolekta og mga hinabang gikan sa publiko.
Si Supt. Noel Gillamac ang hepe sa Police Community Relations sa PRO-7 mibutyag nga may kamandoan si Chief Supt. Lani-O Nerez isip tsirman sa Regional Disasters and Coordinating Council sa pagpatawag sa nagkadaiyang mga sektor, kapolisan ug LGUs sa Central Visayas aron hisgutan ang pagpadala og hinabanag sa Luzon.
Hasta ang mga higanteng local networks ug radio stations milusad og susamang kampanya. Ang GMA-7 ug ABS-CBN Central Visayas nga mga nag-unang TV stations nagbutang og drop-off booths sa Fuente Osmeña ug Capitol Building, samtang ang Mandaue Chamber of Commerce and Industry milusad usab og susamang kalihukan.
Samtang ang labing talagsaon sa tanang nanghatag og hinabang mao ang mga priso sa Mandaue City Jail tungod kay nagkauyon silang di mangaon og usa ka adlaw’ng rasyon nga nagkantidad og P4 sa matag usa kanila ug kini ilang ipadala ngadto sa kaulohan.
Labing gikinahanglan karon sa mga biktima mao ang limpyong mainom nga tubig, mga sinina, pagkaong di daling madaot, de lata, habol, banig, sudlanan sa mga tubig, tambal, housing materials ug uban pa.
Samtang kadtong dunay mga salaping ikadonar dawaton gihapon sa mga drop-off booths o ba kaha idiretso ngadto sa mga bank accounts sa nagkadaiyang media networks nga gituyo gyud alang sa maong relief operations. Mikabat na sa kapin usa ka gatos ang gikaingong nakalas sa maong bagyo ug minilyon usab ang danyos sa kabtangan mapa-pampubliko man o pribado. (Elly Bolonos, Guam Logroño, Darrel Carumba ug Romeo Limpangog) (BANATNEWS)