Panaghiusa suportado ni Tomas

CEBU, Philippines - Gihangop ni Mayor-On-Leave Tomas Osmeña ang pagbanhaw sa mga political leader sa Sugbo sa Partido Panaghiusa.

Ang mayor sa dakbayan nagtuo nga ang maong grupo makahatag usab og labad sa ulo sa subli unyang pagpapili ni Gobernador Gwendolyn Garcia sa katungdanan.

Lakip sa mga ngalan nga milutaw nga iparang kang Garcia sa sunod tuig nga eleksyon mao ang anak ni kanhi Gobernador Emilio “Lito” Osmeña nga si Mariano Antonio “Mimo” Osmeña.

Butang usab nga gihangop sa mayor tungod kay gawas nga pag-umangkon niini si Mimo, kini giingong batan-on, utokan ug buotan nga pagkatawo.

Gitataw ni Osmeña nga ang maong kalidad sa mokandidato maoy pinangita sa katawhang Pilipino hinungdan nga daghan ang ganahan ni Sen. Benigno Simeon “Noynoy” Aquino III.

“Mao nay phenomenon karon nga ganahan ang mga tawo, youth and integrity, mao na ang uso karon that’s why Noynoy is doing very well,” sumala ni Osmeña.

Gipadayag sa mayor nga andam usab niyang suportahan si Mimo kun kini maoy iduso sa Partido Panaghiusa nga i-atbang kang Garcia.

Kahinumduman nga si Osmeña lakip nga miduso kang Tourism Secretary Joseph “Ace” Durano alang sa pagka-gobernador sa Sugbo sa 2010 elections.

Gani gisugyot sa mayor nga ipares kang Durano pagka-bise gobernador sa umaabot nga piniliay mao si Konsehal Hilario Davide III.

Apan gikataho nga ang kalihim sa turismo mas ganahan nga magpapili pagka-senador kay sa paglansar pagka-gobernador sa probinsya.

Sama kang Durano, miingon si Osmeña nga mas dako usab ang kahigayonan ni Mimo nga modaog kun kini mokandidato pagka-gobernador.

“Dako. It will be like Noynoy. Para kanako I prefer that the candidates be young kay mao nay ganahan sa mga tawo,” dugang pamahayag sa mayor.

Wala pa hinuon matino kun interesado ba si Mimo Osmeña nga magpapili pagka-gobernador sa Sugbo sa 2010 elections atbang kang Gobernador Garcia. (Elly Bolonos) (BANATNEWS)