Wanted sa Argao sikop

CEBU, Philippines - Nasikop sa mga sakop sa Regional Mobile Group (RMG-7) sa bukirang bahin sa barangay Anahaw lungsod sa Argao ang gitumbok nga most wanted person sa lungsod sa Ronda nga nag-atubang og kasong murder tungod sa pagpatay sa kaugalingon niining uyoan niadtong Sabado sa alas-singko sa buntag.

Ang nadakpan nga suspek mao si Mario Antifuesto Omboy, 28, kasamtangang nagpuyo sa barangay Anahaw lungsod sa Argao apan lumad nga taga barangay Lower Langin lungsod sa Ronda. Matud ni PO3 Christopher Bani sa Ronda Police dihang nahinabi sa Banat News, ang suspek hapit usa ka tuig nang gipangita human gipusil ug gitigbas patay ang iyang kaugalingong uyoan nga si Genaro Antifuesto niadtong bulan sa Disyembre sa niaging tuig.

Ang mga sakop sa RMG-7 pinangulohan ni Insp. Roland Allecer maoy nakasikop sa suspek human nakadawat kini og impormasyon kabahin sa presensya sa suspek nga mibalhin og puyo sa maong lugar human nakapatay sa iyang kaugalingong uyoan. Kasong murder ang giatubang sa suspek nga gihulagway sa kapulisan sa Ronda nga idlas tungod kay kanunay lang kining makasibat sa higayun nga ilang matiktikan ang nahimutangan niini. Dugang nahipos nga impormasyon nga ang suspek nanimawos sa uyoan tungod kay mao kini ang suspek pagtigbas sa amahan ug pagpatay sa igsuon sa suspek.  – BANAT NEWS