CEBU, Philippines - Manag-agaw nagpatay tungod sa babaye sa miaging gabii sa barangay Alegria lungsod sa Cordova.
Ang namatay mao si Joseph Cañete, 23, taga sitio Mahayahay sa barangay Gabi giunay og pusil sa iyang ig-agaw nga si Joniel Miano, 21, taga sitio Ubos, Poblacion sa maong lungsod.
Nasayran nga ang biktima ug ang iyang mga higala uban sa asawa ni Miano nga si Mercy nagkalingaw og inom sa nahisgutang lugar dihang kalit miabot ang suspek kuyog ang usa ka giilang si Dagami Larobis.
Sa walay daghang pangutana kalit gipusil ni Miano sa likod si Cañete usa ka higayon ug daling miikyas kuyog si Larobis luwan sa usa ka traysikad.
Ang biktima daling gidala sa Mactan Doctors Hospital apan gideklarar kining dead-on arrival sa mga attending physician sa nahisgutang lugar.
Ang kapolisan sa lungsod sa Cordova migukod sa duha ug nangadakpan sa panimalay sa usa ka Lorna Serapin ug nakuha usab ang usa ka .38 rebolber paltik nga may usa ka basiyo nga gituohang maoy gigamit sa pagpusil. Matud pa ni PO2 Calixto Butantan sa pakighinabi sa Banat News, nga ang ilang gitan-aw nga anggulong love triangle ang motibo sa pagpatay. – BANAT NEWS