CEBU, Philippines - Mikabat sa P300 mil nga salapi ang nasakiyo sa wala hiilhing mga kawatan nga milungkab sa usa ka balay ug sakyanan didto sa sitio Cansubing sa barangay Buagsong, lungsod sa Cordova, sa miaging kaadlawon.
Si SPO2 Llovero Agosto miila sa gikawatan nga mao si Judelyn Lange, 36 , minyo, ug nagpuyo sa maong dapit.
Matud pa ni SPO2 Agosto nga giguba sa wala hiilhing mga kawatan ang luyong bintana sa balay sa biktima ug ang tulo ka pitaka nga gisulod sa iyang bag sa iyang lawak maoy gisakiyo.
Lakip nga nahanaw mao ang laptop nga nagkantidad og P70,000, digital camera , ug mga dolyar nga salapi.
Dugang pa ni SPO2 Agosto nga ang sakyanan sa biktima nga gi-parking sa tugkaran sa ilang balay gilungkab usab ug gisakiyo usab ang pitaka sa bana niining langyaw nga adunay sulod nga P20,000 ug $500.
Si SPO2 Agosto miingon nga nagpadayon pa karon ang ilang imbistigasyon aron sa pag-ila sa mga kawatan. - Romeo T. Limpangog (BANAT NEWS)