Eskandalo sa simala imbestigahon na sa simbahan

CEBU, Philippines - Moumol og investigating team si Arsobispo Ricardo Cardinal Vidal kabahin sa mga anomaliya nga nahitabo sa Our Lady of the Holy Eucharist Shrine sa Upper Lindogon, Sibonga.

Sa report sa ABS-CBN, si Vidal nagkanayon nga bisan pa man wala pa makadawat ang Arsobispo og pormal nga reklamo gikan ni Fra. Paul Mary o Venancio Cabillon ug Dr. Erwin Fonghe.

Dugang pa ni Vidal nga ang kura paroko sa parokya sa Simala nga si Fr. Rey Mamararlo maoy gitahasan pagmonitor sa kontrobersiyal nga monasteryo hangtod mahuman ang imbestigasyon.Matud ni Vidal nga wala pa niya mahinabi si Fra. Martin Mary, ang nagdumala sa Marian Monks of the Eucharistic Adoration kabahin sa mga isyu nga miigo sa monasteryo.

Sa susamang kalambuan, si Fra. Paul Mary ug Dr. Fonghe mitug-an nga naandam na ang ilang kasong libelo batok kang Fra. Martin Mary, Cardinal Vidal ug ang nagdumala sa pamantalaang Bag-ong Lungsuranon nga sila si Msgr. Cristobal Garcia ug Fr. Marnel Mejia.

Ang kaso matud pa tungod sa pagpakaulaw sa kadungganan ug pagkatawo ni Fra. Paul sa dihang gipagawas sa Bag-ong Lungsoranon ang notisya nga nagpahibalo nga gipapahawa na sa mga monghe sa Shrine.

Matud pa ni Fra. Paul nga apil sa kaso si Cardinal Vidal tungod sa iyang pagpirma sa dispension order nga wala gani magkuha sa iyang habig ug wala mopahigayon og proseso pagpalagpot kaniya.

Apan gitataw ni Fra. Paul nga ila pang gihatagan og higayon nga makatubag sa ilang gipangayo ngadto sa habig nila ni Fra. Martin, Cardinal Vidal ug kaubanan una pa sila hingpit nga mopasaka og kaso.

“Back to the basic kun unsay giigong sa Ginoo sa Bibliya nga moangkon sila ug mangayo og pasaylo sa ilang gipasakitan, basta ila lang na buhaton wala nay problema," matud ni Fra. Paul.

"Before sa birthday ni Mama Mary niadtong September 2, gitawagan ko ni Fr. Cocoy (Fr. Cosme dela Peña sa (parokya sa) Ronda kay makigkita nako si Cardinal Vidal, one-on-one didto sa Palasyo ug nisulti nga ang numero unong tuyo mao ang paatrason ko sa kaso ug akong giingnan nga dili ko mosibog sa kaso," si Fra Paul nagkanayon.

Samtang si Dr. Fonghe mitumbok nga dili angayan nga basolon og apil sa maong kontrobersiyal ang mga sakop sa media tungod kay una silang nangayo og hustisya ngadto sa lider sa simbahan apan mao ra usab ang nagtukmod nga modangop sila sa media.

Iyang gitataw nga makatulo ka higayon nga gipaadto sa Cebu City Sports Club ang iyang abogado aron mohatag sa P3 milyones pagpahilum kanila apan sa dihang iyang gisugyot nga mag-abot sa laing lugar wala kini miadto.

“Mao bitaw nga gikuyawan ko kun mo-insister mi pangdakpon pa lang mi didto," matud pa ni Dr. Fonghe sa interview sa DyRF.

Si Fra. Paul nanghinaut nga: "ang mga Katoliko ilabi na sa nagsige og adto sa simbahan sa Simala nga dili magpaapekto sa ilang pagtuo kay bisan ako usa ka biktima wa gani magpaapekto sa pagtuo sa Ginoo ug sa mahal nga Birhen Maria. Ang akong ikasulti sa kadagkuan sa simbahan nga unta dili na unta ni mahitabo sa ubang generation ilabina sa mga religious groups.”  - Chester Abadilla (BANAT NEWS)