Jinggoy giigo sa speech ni Lacson

CEBU, Philippines - Gibombahan ni Senador Panfilo Lacson og tulo ka bug-at nga isyu nga pagpakauwaw batok kang Senador Jose “Jinggoy” Estrada sa laing privilege speech nga iyang gipalanog sa hawanan sa senado kagahapon.

Kini sa dihang gibuksan ni Lacson ang iyang privilege speech nga nagkanayon nga kun protector sa jueteng ug amahan sa mga smuggler si kanhi Presidente Joseph Estrada walay duhaduha nga napanunod usab kining kinaiyaha sa iyang anak. Gipahayag ni Lacson nga mao kini iyang panimawos batok kang Senador Jinggoy Estrada kinsa miatake kaniya sa usa ka privilege speech nga gipalanog niini sa senado sa miaging semana nga mipasangil kaniya nga usa ka alalay sa administrasyon.

Gibutyag ni Lacson ang makahahadlok kaayong estorya batok kang Jinggoy nga matud pa niya nakalata pag-ayo sa dungog sa senador nga anak sa kanhi presidente sa nasud.

Gibutyag ni Lacson ang pakighinabi ni Jinggoy ngadto kang Charlie “Atong” Ang niadtong 2006 sa dihang ang naulahi gihinginlan na sa kagamhanan sa Estados Unidos sa America   aron papaulion nganhi sa nasud ug patestiguson sa kasong plunder nga gisang-at batok kang kanhi Presidente Joseph Estrada.

Gipabati ni Lacson ang tape recorded nga tingog ni Jinggoy sa pakighinabi niini kang Ang nga nagkanayon, “pare kung uuwi ka, huwag mo kami idamay si mommy, si daddy nalang, kaya niyang idepensa ang sarili niya”.

Ang ikaduhang gibutyag ni Lacson nga binuang ni Jinggoy mao ang giingong hangyo sa naulahi ngadto sa usa ka operator sa jueteng sa dakbayan sa Baguio nga nagkanayon nga “yung P1 milyon na ibinibigay mo sa kapatid ko, hatiin mo, at sa akin mo ibibigay ang kalahati.” Miingon si Lacson nga gawas sa P500 mil, gihimong P800 mil ang binuwang nadawat ni Jinggoy gikan sa maong jueteng operator. Ang ikatulong gibomba ni Lacson kang Jinggoy mao ang giingon niyang matag higayon nga may pangayuon kining proyekto, magpatabang kini sa usa ka suod niyang Cabinet secretary aron sa pag-follow-up ngadto sa ahensyang hingtungdan. – BANAT NEWS