Bisan paman sa eskandalo, hugot gihapon ang pagtuo sa mga debotos sa mga milagro sa Mahal nga Birhen.
Kagahapon, naabtan sa Banat News ang gatosan ka mga tawong naglinya padulong sa ibabaw nga bahin sa simbahan sa mga monghe aron lang makahalok sa imahen sa Mahal nga Birhen. Usa sa mga ginang nga nagpaila lang sa pangalang Gema taga dalan Cabreros sa dakbayan sa Sugbu nagkanayon nga wala nausab ang iyang pagtuo sa nabantog nang Birhen sa Lindogon ug dili personal ang iyang tuyo sa nagdumala sa maong lugar.
Sa laing bahin tulo ka mga batan-on nga naggikan pa sa Ormoc, Leyte miduaw sa Lindogon aron masaksihan ang kaanindot sa maong lugar ug aron usab makapangayo og lamdag.
Matud pa nila nga nasayod sila sa mga eskandalo diha sa mga balita apan wala gihapon kini makapausab sa ilang pagtuong mag-milagro ang Mahal nga Birhen. Apan kun ang uban wala manginlabot sa eskandalo, usa ka ginang nga nangangkong duha na ka tuig nga deboto sa Birhen sa Lindogon mibutyag nga kun tinuod man kini nasagmuyo siya sa gipanghimo sa mga tagdumala sa maong kongregasyon.
Duha ka mga madre nga volunteers sa maong dapit nagkanayon nga bugtong himuon sa publiko mao ang pag-ampo aron malamdagan ang mga tawong nalambigit sa maong eskandalo.
Hangtod karun nagpabiling hilom ang mga tagdumala sa maong pundok kabahin sa alegasyong may mga malaw-ay'ng panghitabo, pangwarta ug uban pa sulod sa maong monasteryo nga gipasangil sa duha nila ka kanhi monghe ug usa ka deboto. (BANATNEWS)