Ginang gilubongilawom sa balay

CEBU, Philippines - Usa ka ginang nga gituohang namatay human gi-atake sa sakit nga “seizure” gilubong lang sa iyang batan-ong anak ilawom sa silong sa ilang balay apan nahibaw-an sa ilang mga silingan hinungdan nga gi-report sa kapolisan ug gipakawot og balik didto sa Sitio Villaflores, barangay Talangnan, lungsod sa Madridejos, isla sa Bantayan niadtong Miyerkules sa gabii.

Ang namatay nga ginang nga si Enriquita Marabe Escalicas gilubong sa anak nga si Santos, 18, ulitawo ug usa ka drayber og traysikad.

Matud ni PO1 Julius Ceasar Seares sa Madridejos Police Station sa dihang nahinabi sa Banat News nga sa pagpauli ni Santos gikan namasahero iyang naabtan iyang inahan nga migahi na sa lantay.

Apan tungod kay sila lang duha sa iyang inahan nag-uban human naminyo ug nanimuyo sa layong lugar ang uban niyang mga igsuon napugos kini sa paglubong na lang sa patay’ng lawas sa iyang inahan sa silong sa ilang panimalay.

Apan nanabi si Santos sa iyang mga paryente nga gilubong niya ang iyang inahan sa ilawom sa ilang balay. Gi-report kini sa kapolisan ug daling nakig-alayon ang kapolisan sa mga opisyal sa barangay ug mga tanod ug nianang pagka-gabii sa maong adlaw gipaugkat og balik ang patay’ng lawas ug gihaya sa kapilya sa barangay.

Si ABC president Dotty Doremon mipadayag sa dihang nahinabi sa Banat News nga si Mayor Salvador dela Fuente maoy personal nga miabaga sa gasto pagpabalsamar sa patay’ng lawas aron paabuton ang kabanay. Ang gahin gikan sa lungsod igasto pagpabuhat sa nitso niini. Matud ni Doremon nga gikumbinser nila ang kabanay nga motugot alang sa pagpa-autopsy sa patay’ng lawas aron mahibaw-an kun wala bay foul play ang kamatayon niini sanglit gikonpirmar sa anak niini nga dunay sakit nga patol ang maong ginang ug gituohan nga naparok kini sa dihang giatake. – BANAT NEWS