Monghe sa Simala imbestigahon

CEBU, Philippines - Paimbestigahan ni Cebu Archbishop Ricardo Cardinal Vidal ang mga Monghe nga nagdumala sa Lindogon Shrine sa Simala tungod sa mga kontrobersiya nga gipasangil kanila sa ilang mga kanhi kaubanang monghe sa kongregasyon kabahin sa pangwarta, pagpamalit og armas, sex, pagpahigayon og Miss Gay pageant sulod mismo sa kombento ug uban pa.

Si Msgr. Achilles Dakay ang tigpamaba sa Arsobispo sa Sugbu nga nahinabi sa Banat News kagahapon sa buntag miingon nga gumikan sa maong mga pasangil buot karong paimbestigahan ni Vidal ang mga monghe sa nahisgutang relihiyosong pundok.

 Si Fra. Paul Mary kun Venancio Cabillon sa tinuod nga sibil nga pangalan miduol sa media ug mibutyag sa maong mga kahiwian human giingong nasagmuyo ang naulahi nga gipublikar pa gyud sa pamantalaan sa Simbahan sa Sugbu nga Lungsoranon ang iyang pagkataktak ug gibutang hasta ang iyang mga violations.

Matud pa ni Msgr. Dakay nga atua na sa ilang abogado ang legal nga aspeto sa hinungdan nganong gitaktak si Cabillon sa iyang pagka Monghe sa Marian Monk of the Eucharistic Adoration nga nagbase sa Simala sa Lindogon lungsod sa Sibonga.

Sa moral nga aspeto si Dakay mipadayag nga si Cardinal Vidal lang ang nasayod uban ni Fra. Martin Mary ang Superior sa mga Monghe sa Simala ilabi na sa mga kalihukan nga ilang gihimo sulod sa ilang komunidad sa mga Monghe.

Kabahin sa mga law-ay'ng binuhatan lakip na ang pagpahigayon og Miss Gay sa mga Monghe sulod sa kombento, sila mismo sa Artsidiyosesi ang moimbestigar niini inig abot ni Cardinal Vidal gikan sa kaulohan ug misaad si Dakay nga dili nila tabunan ang resulta unya sa ilang imbestigasyon.

Si Cabillon ug usa ka laing kanhi monghe mibutyag usab nga dunay nahitabong sodomy kun pakighilawas sa mga monghe sa kaubang monghe diha sulod sa Lindogon ug ingon man ang pagpamalit og armas.

Matud ni Dakay daghang butang nga ilahang pakisayran sa pagbalik unya sa Sugbo sa Cardinal sama sa pagsusi sa mga dokumento sa maong kongregasyon kun aprobado ba sa Archdiocese sa Sugbo o ba kaha aprobado sa Vatican.

Mibutyag usab silang (mga monghe) nagduda silang dunay napunta sa Artsidiyosesi sa mga donasyong gihulagway nilang minilyon na ang natigom gikan sa mga deboto ug kini gideposito sa nagkalain-laing mga bangko.

Dugang pasangil mao ang wala paghatag og pagtagad sa mga petisyon sa mga deboto kay giingong unahon og ihap ang salaping gipasupot sa petisyon imbes nga iampo dayon ang petisyon.

Samtang susihon usab niini kung adunay mga nagpahimulos sa higayon sa paghatag og mahal nga presyo sa mga materyales nga gipamaligya sulod ug gawas sa Simala nga giingong gipaburot og maayo ang mga presyo.

Gipasabot ni Msgr. Dakay nga sa matag debosyon aduna gyud na ang mga nagkadaiyang materyales sa pag-ampo, apan ang mga materyales sama sa kandila, tubig, imahen, rosaryohan ug uban pa dili kini maoy sukdanan sa usa ka hugot nga pagtuo sa gahum sa Mahal nga Birhen kundili anaa ra usab kini sa isig ka tawo nga hugot og pagsalig ngadto sa Labaw'ng Makagagahum.

Gumikan niini giawhag ni Msgr. Dakay ang mga sakop sa media nga paabuton unta ang resulta sa ilang himuong imbestigasyon aron masuta kung kinsa ang nagsulti sa kamatuoran.

Si Fra. Paul Cabillon monghe sa Lindogon sulod na sa 17 ka tuig mi-resign niadtong Enero 8 ning tuiga sa rason nga kini wala na makaagwanta sa mga kahiwiang gipanghimo sa ilang kongregasyon.

Apan nakugang kini gikan sa iyang pagpakahilom dihang gipublikar duha ka Domingo na ang nakalabay ang pagbiya niya sa pundok ug gibutang pa ang iyang mga violations nga iyang gipangangkong pulos mga bakak.  – BANAT NEWS