CEBU, Philippines - Gitusaktusak og dunggab ang usa ka babaye sa iyang kapuyong nangabubho gumikan sa nabasahang text message sa cellphone sa biktima nga gituohang karelasyon sa babaye.
Ang pagpanunggab nahitabo diha sa sitio Capusoan sa barangay Cambaro dakbayan sa Mandaue sa milabay'ng gabii ug giila ang biktima mao si Mercedita Fuelan, 30, residente sa maong dapit.
Samtang gitumbok sa biktima nga midunggab kaniya mao ra usab ang iyang kapuyong si Wendel Pedrosa, 36, nga giingong nagselos.
Sa imbestigasyon ni SPO1 Reynaldo Urot sa kapolisan sa Station 5 sa MCPO nabasahan ni Pedrosa ang mga text sa cell phone ni Fuelan ug giingong nagselos kini hinungdan sa ilang panaglalis.
Ang suspek tungod sa kapungot milanit og kutsilyo ug gitusaktusak og dunggab si Fuelan sa bukobuko, walang kilid sa lawas, bukton ug uban pang parte sa kalawasan niini.
Gidala si Fuelan sa Mandaue City Hospital ug gibalhin sa Vicente Sotto Memorial Medical Center alang sa dugang pag-atiman samtang si Pedrosa naapsan sa mga tanod sa Cambaro nga padulong na unta og ikyas. Bong Soriano (BANAT NEWS)