Krimen sa Colon mikunhod - Comendador

CEBU, Philippines - Pormal nang gilusad kagahapong adlawa ang pagbutang og Mobile Police Out-post diha sa dalan Colon ug Borromeo nga makaabag sa Task Force Colon pagbantay sa publiko batok sa bisan unsang krimin.

Ang kalihukan gipanguluhan ni Sr. Supt. Patrocinio Comendador, director sa kapulisan sa dakbayan sa Sugbu Konsehal Jun Pe, tsirman sa public order and safety ug ang pinasidunggang dinapit mao si Police Regional Office (PRO-7) director Chief Supt. Lani-o Nerez ug ubang mga opisyal sa kapulisan.

Si Sr. Supt. Comendador, miingon nga ang pagbutang sa Mobile Police Out-post diha sa dalan Colon nakita niyang epektibo human malusad ang Task Force Colon niadtong milabay’ng bulan.

Sa kinatibuk-ang kriminalidad nga natala gikan sa onse ka police stations sa dakbayan sa milabay'ng bulan sa Hulyo, onse porsiyento niini diha nahitabo sa dalan Colon.

Dunay 316 ka krimeng nahitabo base sa talaan sa maong bulan, ug 36 niini diha mahitabo sa dalan Colon, apan sukad nga natukod ang Task Force Colon mikunhod kini og 61 porsiyento ug 50 ka mga petty criminals nga anha mag-operate sa maong dalan ang nadakpan.

Ang dalan Colon maoy giisip nga labing karaang dalan sa tibuok Pilipinas ug nahimong sentro sa komersyo ug negosyo sa dakbayan sa Sugbu gumikan kay kaniadto pa diha na mosulbong ang patigayon ug dugukon usab sa mga tawo.

Si Chief Supt. Nerez mipadayag sa iyang pasalamat ngadto sa mga sakop sa CCPO gumikan kay nakahimo kini’g mga epektibong pamaagi sa pagsulbad sa krimen diha sa dalan Colon.

Gidasig usab niini ang ubang mga police office dinhi sa rehiyon nga sundon ang maayong gihimo sa CCPO sa ilang kampanya batok na sa bisan-unsang krimen.

Naglaraw usab siyang posibleng ipatuman usab sa ubang mga lugar sa rehiyon siete ang maong pamaagi.