CEBU, Philippines - Siyam ka mga mananagat ang nadakpan human masakpi sa akto sa mga sakop sa Bantay Dagat nga illegal nga nangisda sa kadagatan sa barangay Tabagak lungsod sa Madridejos isla sa Bantayan niadtong Sabado sa alas 8:00 sa buntag.
Ang F/B Jinky Princess nga gipanag-iya sa usa ka Abraham Placencia, sa barangay Kabak, Bantayan gisusi sa mga sakop sa Bantay Dagat sa maong lungsod human mabantaying illegal kining nangisda sa maong lugar nga gidili tungod kay kini protektadong gasang.
Ang Bantay Dagat pinangulohan ni Danilo Ytol nakasakop sa grupo ug misikop kanila lakip na ang boat master fisher nga si Eldon Nepangue, 28, Antonio Layese, 23, Marlito Alob, 19, Jeter Pescante, 19, Baste Desales, 22, Ronald Pescante, 38, Argie Sabellano, 19, Neil John Cañete, 20, pulos mga molupyo sa barangay Sulangan Bantayan ug Moker Desuyo, 35, taga barangay Atop-atop, Bantayan. Lakip sa gisakmit sa kapulisan ang ilang mga kagamitan sa pagpanagat ug ang maong mga dinakpan gi-turn-over dayun sa kapulisan sa maong lungsod apil na ang ilang kagamitan sa pagpanagat og ang fishing boat samtang gipaabot pa nga mobayad og multa sa kalapasan niining nahimo. – BANAT NEWS