Dalaga Taga-Manila gidagit

CEBU, Philippines - Usa ka 27-anyos nga dalagang lumad nga taga Quezon City sa Metro Manila ang gialegar nga gidagit sa wala pa mailhing lalaki sa barangay Canduman, dakbayan sa Mandaue sa miaging gabii.

Si PO3 Danilo Damaolao sa Presinto 6 sa Canduman Police Station nga nahinabi sa Banat News miila sa biktima nga mao si Lo Mary Jane Reyes, 27, ug nagtrabaho isip tindera sa usa ka tindahan sa dakbayan sa Toledo.

Matud pa ni Damaolao nga usa ka Lovely Reyes, 20, igsuon sa biktima ug Stephanie Mendoza, 25 , nga kauban sa biktima sa trabaho midangop sa ilang buhatan ug misumbong nga gidagit si Lo Mary Jane sa wala mailhing lalaki.

Sumala pa sa sumbong, ang biktima miadto sa barangay Canduman kay moadto unta sa balay sa iyang igsuon sa may Dream Home Village.

Apan samtang nagpaabot ang biktima sa iyang igsuon diha sa sakyanan sa pasaheroan sa Tintay sa barangay Talamban, dakbayan sa Sugbo usa ka wala mailhing lalaking nagmotor ang miduol dihang gipaangkas kini sa usa ka wala hiilhing tawo sa motorsiklo ug wala hisayri kun diin kini dad-a.

Matud pa ni Damaolao nga nakontak pa sa mga igsuon ang biktima pinaagi sa cellphone niini ug kini giingong nangayo og panabang gidagit siya, gani hasta si Damaolao miingon nga nahinabi usab nila ang biktima pinaagi gihapon sa cellphone ug nasayran nilang anaa ra kini sa bukirang bahin sa barangay Canduman.

Apan dihang ilang giadto ang dapit sa barangay Canduman nga ilang gituohang nahimutangan sa biktima apan wala na nila kini makontak .

Si Damaolao miingon nga nagpadayon pa ang ilang gihimong follow-up aron sa pagsuta kun tinuod bang gidagit ang biktima ug kinsa usab ang midagit niini. – BANAT NEWS