CEBU, Philippines - Mopahigayon na usab og satellite registration ang duha ka buhatan sa Comelec sa dakbayan sa Sugbu karong adlawa.
Tumong niini, aron mahatagan og higayon ang mga botante sa siyudad nga marehistro ug makabotar sa sunod tuig nga eleksyon. Ang Cebu City Comelec-South District anha karong adlawa sa Cebu City Jail mopahigayon og satellite registration. Matud ni City Election Officer Edwin Cadungog nga ang ilang himoon nga off-site registration gipasubay usab sa kamanduan sa ilang uluhang buhatan. “Ubay-ubay man sab (inmates), so, ato lang respituhan ang ila pud nga katungod, as much as possible, ma-exercise nila ang ilang political rights,” sumala ni Cadungog.
Butang nga gihangop usab ni City Jail Warden Superintendent Efren Nemenio nga maoy nihangyo sa Comelec alang sa maong katuyoan.
“Advantageous man gud na kaayo kay maminusan ang risk ba sa mga inmates, takas or what, unya mas paspas pud kay sa ato silang ihatod sa Comelec,” matud ni Nemenio. Una nang mipahigayon og satellite registration ang Comelec sa north district diha sa City Jail niadtong Agosto 21 diin kapin sa 200 ka mga piniriso ang narehistro. Partikular na niini ang mga binilanggo nga pabilin pang nagpaabot sa husay ingon man sa desisyon sa ilang mga kaso nga giatubang. – BANAT NEWS