CEBU, Philippines - Gisugyot karon ni Basak-San Nicolas barangay captain George Rama nga ilakip sa line-up sa Bando Osmeña Pundok Kauswagan (BOPK) pagkakonsehal sa siyudad sa Sugbu ang kandidato nga nagagikan sa bukirang barangay sa dakbayan.
Kini tungod kay alang kang Rama, mas suhito sa problema sa kabukiran ang konsehal nga nagagikan sa bukirong barangay.
Gawas niini miingon ang barangay kapitan nga dali ra usab kaduolan sa iyang mga kaubang kapitan sa kabukiran ang konsehal nga gikan sa han-ay niini.
“Naa gyuy candidate gikan sa mountain barangay kay aron dunay sayon kaduolan ang mga mulopyo didto unya mas labaw pud nga nasayod sa ilang problema,” sumala ni Rama. Butang nga gihangop sa lider sa BOPK nga si Mayor Tomas Osmeña uban sa pagpadayag nga iyang ikunsiderar ang sugyot sa barangay kapitan.
Bugtong lang panagana sa mayor tungod kay giingong walay posibling kandidato gikan sa bukirang mga barangay nga ilado usab sa urban barangay. “Maayo gyud kung naa tay kandidato gikan sa bukid pero kung mapildi unsa may advantage sa mga molupyo didto,” matud ni Osmeña.
Gipadayag hinuon sa mayor nga ilang tun-an ang posibilidad paglakip og kandidato sa BOPK nga nagagikan sa bukirang mga barangay.
Apan giklaro ni Osmeña nga daghang factor usab ang angayang ikunsiderar aron masulod ang usa ka kandidato sa line-up sa BOPK.
Nasayran nga tulo ka luna pagka-konsehal sa 2010 elections ang gikinahanglan sa BOPK sa north district ug duha usab sa south district sa siyudad.
Kini tungod kay sila si Konsehal Christopher Alix, Sylvan “Jack” Jacosalem ug Nestor Archival sa amihanang distrito, ug Konsehal Gerardo Carillo ingon man Arsenio Pacaña sa habagatang distrito, anaa na sa ikatulo ug katapusan nilang termino.
Lakip sa posibleng mohulip kanila mao sila si Luz barangay captain Nida Cabrera, barangay kapitan Jose Marino Benedicto sa Zapatera, ABC president Eugenio Faelnar ug ang asawa ni konsehal Carillo nga si Jaybee Binghay-Carillo. – BANAT NEWS