CEBU, Philippines - Gihulagway sa usa ka barangay kagawad sa Apas ning siyudad sa Sugbo nga "badlongon" ang napiling Sangguniang Kabataan (SK) chairman sa ilang barangay.
Ang gitumbok ni Kagawad Allan Majait mao ang giingong kanunay mopalta sa ilang sesyon nga SK chairman nga si Jan Nichol Verzosa.
Matud ni Majait nga labing minos siyam na ka sesyon sa ilang konseho nga wala makatambong ang nahisgutang SK chairman.
Gipadayag sa konsehal nga makapila na nila patubaga si Verzosa niini, apan kini giingong igo lang mongisi ug dili motubag.
"Imong estoryahan igo lang mongisi pero dili sab ka kadungog nga motubag nimo, kapila na gud na namo siya gi-warningan," sumala pa ni Majait.
Midugang ang konsehal nga manghulga usab si Verzosa kanila nga mokiha kun ilang pugngan ang honorarium niini tungod sa pagka-absenos.
Ang pamahayag ni Majait gidasonan usab sa ilang kapitan nga si Ramil Ayuman nga dismasyado usab sa gihimo sa ilang SK chairman.
Nagkanayon si Ayuman nga walay respeto si Verzosa sa mga sakop sa konseho hinungdan nga kini gusto nilang madisiplina.
Miingon ang barangay kapitan nga ang ilang konseho mipadangat na sa problema sa ilang SK chairman ngadto sa Ombudsman Visayas.
"Amo lang gi-refer ngadto sa Ombudsman kung unsa ang appropriate action nga i-file against sa among SK chairman, sila nay mo-evaluate ato," matud ni Ayuman.
Gitataw sa kapitan nga wala na nila ipa-imbestigar sa SK Federation sa siyudad si Verzosa tungod kay kini wala mohatag og pagtagad sa una nilang reklamo.
Nagtuo si Ayuman nga mahatagan og igong pagtagad ug leksyon ang ilang SK chairman.
Kuhaan unta sa Banat News ug reaksiyon si Verzosa, apan dili ma-contact ang duha ka mobile phone number ingon man ang landline niini. – BANAT NEWS