CEBU, Philippines - Napalgang patay na nga nagbitay ang usa ka tawo kinsa naghikog pinaagi sa paghigot og pisi nga nylon sa iyang liog sa sulod sa ilang balay sa barangay Mulao, sa lungsod sa Liloan kagahapon. Si SPO1 Claudio Castro Jr. sa kapolisan sa maong lungsod miila sa namatay nga si Cristito Lungtad, 52 , minyo, nga taga Mulao.
Matud pa ni SPO1 Castro nga gikan pa nga nanghipos sa gitugway nga baka ang asawa ug maoy naabtan niini ang bana nga nagbitay na sa pising gihikot sa iyang liog kansang pikas tumoy gigaid didto sa atop sa ilang balay.
Midugang siya nga walay gibutyag ang pamilya sa biktima sa hinungdan sa paghikog sa ilang amahan.
Si SPO1 Castro miingon nga dili pa nila ikahinabi ang asawa sa namatay kay anaa pa kini sa kaguol busa wala sila’y nakuhang dugang kasayoran bahin sa maong paghikog. Nagtuo si Castro nga naghambin og bug-at nga suliran ang namatay nga maoy hinungdan sa paghikog niini. - Romeo T. Limpangog (BANAT NEWS)