Trabahante giluba sa tulisan angol

CEBU, Philippines - Usa ka kawani sa Mactan Export Processing Zone (MEPZ) naangol human kini dunggaba sa usa ka tulisan didto sa Sitio Allied, Barangay. Pusok, dakbayan sa Lapulapu kagahapon sa buntag.

Ang biktima mao si Jayzel Mijares Abaniel, 20, ulitawo, nga taga sitio Seawage, Pusok sa maong dakbayan.

Si SPO1 Frederick Eslit sa Crime Against Person mibutyag sa Banat News nga sa mga alas 5:30 kagahapon sa buntag padung na unta si Abaniel sa iyang trabaho nga naglakaw sa maong dapit dihang kalit lang mitumaw ang duha ka wala hiilhing tawo ug mideklarar nga tulis.

Bisan og gitionan siya og mahait nga hinagiban, ang biktima nagdumili gyud sa paghatag sa iyang cellphone hinungdan nga gilabni ang maong cell phone sa usa sa mga tulisan, samtang ang laing tulisan maoy miluba sa biktima.

Si Abaniel nga samaran sa iyang wang kilid gidali paghatod ngadto sa   Lapulapu City Hospital samtang ang duha ka mga tulisan maoy gipangita karon sa kapolisan. - Bong Soriano (BANAT NEWS)