CEBU, Philippines - Luwas ang 19 ka mga tripulante nga Pilipino ug Koreano sa pagkalunod sa foreign vessel nga M/V Hera sa kadagatan sa Eastern Samar kagahapon sa buntag usa ka adlaw lang ang distansya human sa pagkalunod sa Superferry-9 sa kadagatan sa Zamboanga Peninsula niadtong Domingo sa buntag diin siyam ka pasahero na ang namatay.
Drayber gipusil patay sa Cabreros
Patay ang usa ka drayber og taxi human gipusil sa duha ka nag-motorsiklong mga suspetsado samtang naglakaw sa may Cabreros Street, Natalio Bacalso Avenue barangay Basak San Nicolas.
Ang biktimang si Ignacio Rosalita Tabilon, 60 anyos, taga Lipata Minglanilla, namatay dihang naigo sa iyang buko-buko ingon man ulo gikan sa tulo ka mga bala gikan sa kalibre .45.
Si PO2 Michael Codaste, imbestigador sa Homicide Section sa Cebu City Police Office nga gikahinabi sa Banat News nagkanayon nga posibleng dunay atraso ang biktima hinungdan nga gisundan ug gipatay.
Hinuon ila pang susihon ang background sa gipatay tungod kay dako ang posibilidad nga duna kini gikaaway o laing motibo sa pagpatay niini. Ang kapolisan dunay nakuhang tulo ka mga saksi nga naatol nga nag-estambay diha sa maong dapit dihang naabot ang mga mamumuno ug kalit nga mipusil sa biktima.
Matud pa sa usa sa mga saksi mihunong ang motorsiklo nga binabaye ug nanaog ang angkas nga triggerman nga nag itom og t-shirt naka-full-faced helmet, nag-shorts og maong ang mipusil sa biktima. Sumala pa niini nga dihang naigo ang biktima sa iyang buko-buko nahagba kini dayon sa karsada apan giusban kini pinaagi sa pagdul-it sa pagpusil diha sa iyang ulo.Human sa maong pagpamusil ang triggerman midagan kini ngadto na sa nagpaabot nga drayber sa motorsiklo nga sa eskina nagpaabot. (Guam Logroño) (BANAT NEWS)