CEBU, Philippines - Ubay-ubay nga mga adlaw ang walay trabaho ug walay klase sa mga pribado ug publikong mga tunghaan ug buhatan dinhi sa Sugbu ug sa tibuok kapupud-an niining buwana.
Ugmang adlawa, Septiyembre 7, gideklarar na ni Presidente Gloria Macapagal Arroyo nga special non-working holiday dinhi sa nasod isip pag-obserbar nga national day of mourning pahinungod sa kamatayon ni Eraño Manalo, ang executive minister sa Iglesia ni Cristo (INC).
Ang spiritual leader sa INC namatay niadtong Agosto 31 sa edad nga 84 anyos, tungod sa Cardio-Pulmonary arrest.
Sa pikas bahin, walay klase usab sa pipila ka Catholic schools sa Sugbu karong Martes, Septembre 8, tungod sa kapistahan ni Birhen Maria.
Samtang unya sa Miyerkules, Septiyembre 9, walay klase ug walay trabaho usab sa kinatibuk-ang dakbayan ug lalawigan sa Sugbu subay usab sa Akta Republika 6953 agi og pahinungod sa Sugbuanong kanhi presidente nga si Sergio Osmeña Sr..
Usa ka programa ang ipahigayon karong Miyerkules sa buntag sa marker site sa kanhi presidente diha sa eskina sa mga dalan Lapu-Lapu ug Osmeña Boulevard nga sugdan og usa ka Santos nga Misa ug floral offering sa mga kawani sa City government ug sa kabanay sa mga Osmeña.
Samtang gideklarar na usab ni Arroyo ang Septiyembre 21 nga non-working holiday sa tibuok kapupud-an pag-obserbar sa Muslim holiday nga Eid’ul Fitr nga nagtimaan sa katapusang adlaw sa puasa sa tibuok buwan sa Ramadan.
Ang Labor Code naglatid nga kadtong motrabaho sa mga special non-working holiday makadawat og dugang 30 porsiyento sa ilang inadlaw nga suhulan. (Elly Bolonos) (BANAT NEWS)