Barangay apil sa Anti-Rabies Ordinance
CEBU, Philippines - Nangandam na ang Department of Veterinary Medicine and Fisheries (DVMF) sa Cebu City Hall alang sa pag-deputize og mga barangay personnel aron moabaga pagpatuman sa City Pound and Rabies Control Amendatory Ordinance nga nag-ungot na sa konseho sa siyudad.
Matud sa labaw sa DVMF nga si Doctor Alice Utlang nga labing minos 80 ka barangay personnel ang ilang i-deputize alang sa pagpatuman sa ordinansa.
Nagkanayon si Utlang nga ila unyang hatagan og citation tickets ang mga deputized agents ug maoy mo-issue niini ngadto sa malapasong pet owners.
Ang ordinansa nga gipalabang ni Konsehal Edgardo Labella magpahamtang og bug-at nga silot niadtong mga tag-iya og iro nga makahimo og kalapasan sa balaud.
Kini gipahaom usab sa konsehal sa Akta Republika 9482 kon ang Anti-Rabies Act of 2007 nga gitinguha sa City government nga mapatuman sa hingpit.
Sa susamang kalamboan, kadtong ma-impound o masikop nga mga iro ipalukat usab sa tag-iya niini og P500 ngadto sa P1,000.
Tambag ni Utlang ngadto sa mga pet owners aron dili masugamak sa taas nga multa, nga iparehistro na ang binuhing mga iro niini diha sa ilang buhatan.
Miingon si Utlang nga P150 lang ang bayran sa mga pet owners ug libre na niini ang pagbakuna, dog tag and collar, vitamins, purga, ug uban pa sulod sa usa ka tuig. - Elly Bolonos (BANAT NEWS)
- Latest
- Trending
