Pagsibog ni Roxas gi-uyonan sa 2 officials

CEBU, Philippines - Miani og positibong reaksiyon sa mga opisyal sa dakbayan sa Lapulapu ug Mandaue ang pag-atras ni Senador Mar Roxas sa iyang planong pagdagan pagka-presidente sa nasud sa tuig 2010 ug mituboy kang Senador Benigno “Noynoy” Aquino pagka-presidente. Si Mandaue City Vice Mayor Carlo Pontico Fortuna mipadayag sa iyang kakurat sa giluwatang hukom ni Roxas tungod kay nagtuo siyang lig-on unta ang tandem nga Roxas – Aquino. 

Si Roxas nangangkong usa ka dakong sakripisyo alang sa kaayuhan sa katawhang Pilipino alang usab sa tinuoray nga kausaban sa natad sa politika ug sa nasud ang iyang gihimo.

 Matud pa ni Fortuna gipakita ni Roxas ang legasiya sa iyang apohan ug amahan nga nagdala usab kaniadto sa renda sa pangagamhanan sa nasud sa milabay nang katuigan.

 Samtang si Lapulapu City Vice Mayor Mario Amores sa iyang bahin dako ang pagtuong ginuklogan gyud og maayo ni Roxas ang maong desisyon gikan sa mga sakop sa Liberal Party ug pamilya.

Matud pang Amores dili sayon ang gihimo ni Roxas ilabi na nga dako na kini og nagasto sa iyang mga TV ug radio advocacy plugs ug infomercials. - Bong Soriano (BANAT NEWS)