CEBU, Philippines - Natambakan na og abo sa karbon ang yuta sa pamilyang Balili nga gibayran og P98 milyones kapin sa Kapitolyo didto sa lungsod sa Naga atol sa pag-inspection nga gihimo sa mga tinugyanan sa Ombudsman Visayas kagahapon. Si deputy Ombudsman Virginia Santiago maoy nangulo sa team nga gikuyogan sa mga opisyal sa Department of Envinronment and Natural Resources (DENR) nga miinspection sa maong lote didto sa barangay Tinaan, sa maong lungsod.
Sumala sa report ni Santiago ug mga kaubanan nga ang nakita nilang punong kon mga fish pond ug mga bakhawan, dili mahimong sumbanan aron ilang kahusgahan kun mao na ba kini ang nagrepresentar sa 80 porsento sa 25 ektaryas nga katibuk-ang luna nga matud pa anaa naglubog sa ilawom sa dagat.
Ang katuyoan sa taga DENR sa pag-inspection sa mong yuta mao ang pagsuta sa tukmang gidak-on sa bahin niini nga anaa sa ilawom sa dagat.
Hinuon matud pa ni Santiago nga nagkinahanglan pa og tulo ngadto sa lima ka adlaw una matapos ang maong survey kay ila pang tultolon ang mga mohon niini aron masuta kun pila gyud ka porsento sa 25 ektaryas ang tinuod nga nalubong sa dagat. – BANAT NEWS