Intsik gipatay sa igsuon

CEBU, Philippines - Nabulit og katorse ka samad pinusilan ang tibuok lawas sa usa ka intsik nga negosyante human gipusil sa iyang maguwang niadtong Lunes sa hapon sa sulod sa compound sa Villa Leonila barangay Bitoon lungsod sa Daanbantayan.

Namatay paglabay sa pipila ka minutos sa tambalanan ang biktimang si Ernest Lim Du, 48, temporaryong nagpuyo sa nahisgutang lugar taga Francisco Village sa Happy Valley ning dakbayan sa Sugbu.

Samtang ang gitumbok nga suspetsado mao ang iyang maguwang nga si Eric Lim Du, 50 kapin ang pangidaron, nagpuyo sa nahisgutang lugar kinsa daling nisibat human sa krimen nga gipangita na sa kapulisan.

Si Chief Insp. Laurel Almirante, hepe sa Daanbantayan police station sa pakighinabi sa Banat News mibutyag nga nanag-iya og beach resorts sa maong lungsod, fishponds sa Tabuelan ug mga ahensya sa patantuhan sa alahas sa dakbayan sa Sugbu ang biktima.

Matud pang Almirante ang motibong ilang gisubay karon mao ang panag-ilog sa kabtangan ug katigayunan sa mga ginikanan sa managsuon.

Samtang gibutyag ni Almirante nga nasulod na sa rehabilitation center ang biktima kaniadto ug giingong niadtong tungura sa pagkahitabo giingong nangayo og kwarta sa ilang inahan ang biktima nga gikasuko sa suspek ug miresulta sa pagpamusil.

Si PO2 Columbus Noynay sa Daanbantayan Police Station nga gikahinabi sa Banat News nagkanayon dihang naabot ang ilang mga kaubanang police sa dapit uban ni kapitan Ansio Lanurias, gisugat sila sa caretaker nga giilang si Ricky Minghay ug gitultulan sa sulod sa compound.

Sumala pa sa mga polis ilang naabtan ang biktima nga naglunang sa kaugalingong dugo nga nagbuy-od apan buhi pa kini ug maka-estorya.

Diha-diha ang imbestigador nga si SPO3 Cesar Carlos Alburo ang daling nangutana ngadto sa biktimang si Ernest kung naunsa kini ug kun kinsa ang mipusil kaniya ug unsang armas ang gigamit.

Ang biktima gikatahong mihingalan sa iyang igsuong si Eric Du maoy mipusil kaniya ginamit ang .9mm kalibreng armas tungod sa kwarta.

Gidali dayon sa pagdala sa Daanbantayan District Hospital ang biktima apan samtang nagpadayon sa pag-imbestigar ang mga police sa crime ilang nahibaw-an nga mga alas 3:40 nakabsan na sa kinabuhi ang biktima tungod sa katorse ka samad pinusilan sa lawas.

Nakuha sa crime scene ang napulo ka mga basiyo sa bala sa .9mm upat ka mga slugs niini, P3,500 cash , mga personal nga dokumento ug cellphone.

Nasuta sa kapulisan nga ang suspetsado didto kini ni-agi sa luyong bahin sa compound human sa krimin ug wala na gayud kini maabti pa sa kapulisan. - BANAT NEWS