CEBU, Philippines - Nalungag ang tuong dughan sa usa ka tawo human kini pusila sa iyang silingan didto sa sitio Seabreeze, barangay Mactan, dakbayan sa Lapulapu sa miaging gabii.
Ang biktima mao si Jefferslon Badajos, 31, minyo, nga taga Seabreeze , samtang ang suspetsado mao si Rodel Clemente, hingkod ug construction worker nga silingan sa biktima.
Si SPO3 Rex Ybanez sa homicide section sa maong dakbayan mibutyag sa Banat News nga ang biktima naglakaw lang pauli sa ilang balay dihang kalit lang gipusil sa suspetsado.
Matud pa ni SPO3 Ybanez nga sa sayo pa gitabangan og kulata si Clemente sa grupo nga kontra niya sa basketball ug nabulit siya sa bun-og.
Apan si Badajos kinsa nakasaksi sa maong hitabo, igo lang kunong mitan-aw ug wala gyud motabang sa suspetsado bisan pa kun nagpakitabang kini kaniya.
Sa iyang kalagot imbis kadtong nangulata kaniya maoy pahimungtan, ang biktima na hinuon maoy iyang giluthang.
Sa pagkakaron gipangita sa kapolisan ang suspetsado human kini mosibat samtang ang biktima nagpaalim sa iyang samad sa hospital. (BANAT NEWS)