Pahulay na sa politika: Atan ngadtong Tomas

CEBU, Philippines - Gitambagan ni opposition leader Jonathan “Atan” Guardo si Tomas Osmeña nga mopahulay na sa politika human maoperahe sa iyang urinary bladder cancer sa sayong bahin niining tuiga.

Si Guardo maoy mitambag sa mayor human subling gipadayag ni Osmeña nga posibleng magpapili pagka-kongresista sa south district sa 2010 elections.

Nabalaka si Guardo sa kahimtang sa panglawas sa mayor tungod kay giingong dili lalim ang pagpangampanya ngadto sa nagkadaiyang barangay.

Alang sa opposition leader, daghan na og nahimong mga programa ug proyekto si Osmeña ug wala na kini angayang pamatud-an pa sa iyang kaugalingon.

Tungod niini, si Guardo miingon nga ang mas angayang hatagan og prayoridad sa mayor karon mao ang iyang panglawas ingon man ang pamilya niini.

“Ang ako lang ika-advice nga he should run for his life, unahon gyud niya ang iyang kaugalingon, ang iyang health and family more than anything else kay kahibawo ta nga delicate kaayo ang health situation ni mayor karon, it is not advisable for him to keep going around to different barangays in the south district,” sumala pa ni Guardo.

Gipadayag ni Guardo nga dili angayang paminawon sa mayor ang mga hungihong sa mga tawong nagpalibot kaniya nga giingong ang interes ra niini maoy gihuna-huna.

Gitataw ni Guardo nga dili angayang isipon ang iyang tambag nga usa ka timailhan sa iyang kahadlok nga makig-atbang sa mayor sa umaabot nga eleksyon.

Ang nahisgutang lider sa oposisyon una nang mipadayag nga magpapili og usab sa south district human mapildi ni Kongresista Antonio Cuenco sa miaging piniliay.

Giangkon hinuon ni Guardo nga bisan kinsa pa ang ilang ikaatbang sa Bando Osmena Pundok Kauswagan (BOPK) magpabilin gihapong underdog ang oposisyon.

“We will always be the underdog but it does not mean nga nahadlok or mahadlok mi nila kay kaning among paglaban padayon na ni siya whether Goliath among kontra or anybody else padayon na gyud ni, we have already decided to put up a strong slate next year,” dugang pamahayag ni Guardo.

Malaumon ang nahisgutang lider sa oposisyon nga magmabungahon ang ilang paningkamot alang sa umaabot nga 2010 elections.

Nasayran nga nakaangkon og makusog nga pakpak ang pamahayag ni Osmeña dihang gipahibawo niini nga siya posibleng magpapili pagkakongresista atol sa recognition ug induction ceremony sa kapin sa usa ka gatos ka mga sakop sa Barangay Councilors’ League of the Philippines (BCLP) Cebu City Chapter nga gi-deputize isip mga traffic enforcer sa dakbayan niadtong Sabado. – BANAT NEWS