CEBU, Philippines - Hubog nga nagmaoy ug nanglambos sa mga lamesa ug lingkuranan sulod sa usa ka videoke bar gitusak-tusak sa pagdunggab hangtud namatay kagahapon sa kaadlawon diha sa sitio Lawis barangay Luray II dakbayan sa Toledo.
Ang namatay giila sa kapulisan nga si Lloyd Geraldez, 25, nagpuyo sa nahisgutang lugar samtang ang suspetsado ginganlan lang og “Jeno” nga nagpuyo sa sitio Tunnel, Poblacion sa nahisgutang dakbayan.
Si SPO2 Gil Lastimosa, sa Toledo City Police Station nga gikahinabi sa Banat News nagkanayon nga hubog ang biktimang si Geraldez niadtong higayuna nga didto sulod sa videoke bar.
Matud pa nga nanghagis lang og kalit ang biktima ug gipangbunal ang mga lingkuranan, lamesa hinungdan nga gibadlong kini ni Bonifacio Lazaga, ang operator sa videoke nga taga barangay Ilihan ug usa ka kustomer nga ginganlan og “Jeno.”
Apan tungod sa kahubog, wala mopatuo ang biktima hinungdan nga nagkaguliyang sa sulod sa maong imnanan apan nidagan kini paingon ngadto sa ngitngit nga lugar ug gigukod nila ni Lazaga ug sa ginganlan og Jeno.
Paglabay sa pipila ka minutos nabalik ang biktima nga duna nay daghang mga samad dinunggaban sa nagkadaiyang parte lawas ug nabugtoan sa kinabuhi.
Si SPO2 Lastimosa, nagkanayon nga nag-selos ang biktima human usab ang kanhi niini uyab mitrabaho sa maong imnanan hinungdan nga dihang nahubog nanghagis.
Hinuon si Lazaga, boluntaryong mitahan sa iyang kaugalingon sa kapulisan aron pag-limpiyo sa iyang pangalan ug nangangkong wala siya'y kalambigitan sa krimen ug igo lang siyang niapil sa paggukod niadtong higayuna.
Giingong ang ginganlan og Jeno maoy midunggab sa biktima ug daling misibat human usab sa maong sa krimen. – BANAT NEWS