Bayani Fernando nangangkong maoy standard bearer sa Lakas - Kampi

CEBU, Philippines - Siyam ka buwan nalang gikan karun sa dili pa ang eleksyon, si Metro Manila Development Authority (MMDA) Chairman Bayani Fernando mipahibawong modagan pagka-presidente sa nasud ubos sa partido sa Lakas-Christian Muslim Democrats kun Lakas-CMD ug Kabalikat ng Mamayang Pilipino (Kampi) Presidente ni Gloria Macapagal Arroyo.

Si Bayani nia sa siyudad sa Sugbu sukad pa niadtong Huwebes ug kagahapon buntag, siya maoy guest speaker sa Barangay Council’s League of the Philippines Cebu City ug Mandaue Chapter diha sa Grand Convention Center. Si Bayani nagkanayon nga siya na ug wala nay lain pang standard bearer sa LakasCMD-Kampi sa pagka presidente karung umaabot eleksyon sunod tuig.

Siya nipasabot, nga si Bise Presidente Noli De Castro dili maoy standard-bearer sa maong partido sanglit napakyas kini pagtunga niadtong Hulyo 30 dihang si presidente Arroyo mipatawag og tigom aron sabot-sabotan kun kinsay padaganon pagka-presidente sa 2010.

Laing rason ni Fernando mao nga si De Castro gikan sa laing partido ug nitapon lang kini sa Lakas CMD-Kampi. Laing gihugon-hugonan nga padaganon pagka presidente si Defense secretary Gilbert Teodoro, apan matud ni Bayani layo na kaayo ang posibilidad nga si Teodoro maoy himuong standard bearer sa ilang partido.

Sa dihang gipangutana sa mga tigbalita si Fernando kun dili siya ang pilion ni Arroyo, siya mitubag nga “I will pursue to run for president without the endorsement of the president.”

Apan kun si De Castro ang pilion ni Arroyo daghan sa iyang mga kauban ang mobalhin sa laing partido ug usa na siya niini.

Matud ni Fernando nga base sa iyang kasinatian, sa dihang nahimo pa siyang mayor sa Marikina City sulod sa tulo ka termino, ang iyang pagka negosyante ug ang pagka-Chairman sa MMDA naglaom siyang mapalambo ang nasud kun siya na ang sunod nga presidente.

Giangkon ni Fernando nga daghan ang nangasuko kaniya apan iya lang gipatigbabaw ang iyang “political will” pagpatuman sa husto pinasubay sa balaod aron hapsay ug malinawon ang iyang siyudad.

“City of Marikina is protecting the health of the people,” padayag pa niya, kinsa nidugang kun wala pa niya mahapsay ang siyudad hayan liboan ka mga tawo ang natakboyan og klase-klase nga mga kagaw. Dili motuo si Fernando sa mga nanggawas nga latest survey nga nag-una ang ubang mga presidentiables kay alang kaniya ila lang ka nga survey sa usa ka politiko. - Rey Pasaporte (BANAT NEWS)