CEBU, Philippines - Mga lugar sa dakbayan sa Sugbo kagahapon ang nakasinati og brown-out tungod sa ka kuwang sa supply sa kuryente.
Si Ethel Natera sa Visayan Electric Company (VECO) sa pakighinabi niini sa Banat News kagahapon mibutyag nga mga alas 10:00-11:00 kagahapon sa buntag ang barangay Ermita, N. Bacalso Avenue, barangay Inayawan paingon na ngadto sa habagatang bahin sa Sugbo ang nakasinati og power outage.
Ug nianang mga ala 1:00-1:15 sa hapon napagngan usab og kuryente ang barangay Carreta, Mango Avenue, Echavez, Ramos, Zapatera, barangay San Antonio, Sambag I ug II, Gorordo ug Escario.
Sa gipadangat nga email ni Natera sa Banat News kini mibutyag nga sa 34 megawatts nga ila untang kontribusyon sa manual load dropping tungod sa power outage kagahapon, 13.5 megawatts ray ilang nahatag sa buntag ug 18.5 megawatts sa hapon. Apan nagkanayon nga posibleng ang mga planta o kompaniya nga nag-suplay sa kuryente nagka-problema sa ilang ekipo ug pasilidad.
Sanglit walay nakitang problema sa mga pasilidad sa VECO ug naghuwat pa sila sa advise gikan sa National Grid Corporation of the Philippines (NGCP) kung duna pa bay laing power shortage. – BANAT NEWS