Kiha ni Gwen vs. CH nukos-nukos

CEBU, Philippines - Gihulagway ni kanhi Senador Sony Osmeña nga usa ka “nukos-nukos” ang laraw sa Kapitolyo   pagpasaka og kasong kriminal ug administratiba batok ni Mayor Tomas Osmeña tungod sa pag-develop sa luna sa South Road Properties (SRP).

Si Osmeña nagkanayon nga si Gobernador Gwendolyn Garcia “nangita lamang og lain ika-divert sa attention sa mga tawo aron adto na makatutok sa kiha sa siyudad labot sa SRP.”

Nagtuo si   Osmeña nga ang katuyoan ni Garcia sa pagtipas sa atensyon sa mga tawo gitumong aron matabunan ang kasong plunder nga nahimo sa pagpalit sa lote sa pamilyang Balili didto sa lungsod sa Naga nga nalubog sa tubig dagat ug kabakhawan.

Ang kanhi senador nagkanayon nga siya maoy naluoy kang   Juan Bolo nga maoy gihan-okan sa tanang pagbasol labot sa maong isyu apan dili gihapon kini makasulti sa tinuod kay “nakaugom” na usab kini sa komisyon sa pagkahalin sa lote. Apan ang kanhi senador mitataw nga dili makalikay si Garcia sa maong kontrobersiya tungod kay siya ang nagpirma sa Memorandum of Agreement ug siya usab ang nagpirma sa tseke isip dinalidali nga pagbayad ngadto sa mga Balili.

Si Osmeña miingon usab nga usa ka “unauthorized disbursement” ang gihimo sa gobernadora tungod kay wala may appropriation nga naaprobahan sa hunta probinsiyal. "Legally speaking and morally speaking siya si Gwendolyn Garcia Codilla wala gyu'y nakapahiran kay siya man ang nagpirma sa tseke. Gawas pa niini way appropriation niana ang provincial board para nianang tuyoa....diin man sila nianang kwartaha ....so ang tresurero maapil sab sa plunder," dugang pa ni Osmeña. – BANAT NEWS