Tulisang naunay sa iyang armas sikop

CEBU, Philippines - Nasikop sa kapolisan sa dakbayan sa Talisay niadtong Martes sa gabii ang usa ka suspetsadong tulisan kinsa gikang mitulis sa usa ka babaye diha sa barangay Mambaling dakbayan sa Sugbo niadtong gabhiona.

Ang suspetsado giila sa mga polis nga si Redentor Balongag, 28 nga taga sitio Cabusas, barangay Tabunok, Talisay. Ang giingong nabiktima ni Balongag mao si Maria Rosar Abella, 23,-nga taga 370 Back Rubber World, Basak San Nicolas, Dakbayan sa Sugbo.

Ang nakadakop sa suspetsado mao sila si Sr. Inspector Noli Cernio, PO3 Louie Alalim, PO3 Ferdinand Pablo, PO3 Arnold Damasco, PO2 Henry Mata, PO2 Leandro Azarcon ug ang mga sakop sa Talisay City Intelligence Branch (TCIB) kinsa nag-checkpoint niadtong higayona didto sa sitio Cabusas. Nasakmit sa mga polis gikan kang Balongag ang usa ka kalibre. 45 nga pistola, usa ka magazine niini nga may upat ka buhing bala ug ang motorsiklong gigamit niini nga Honda Dream, nga kolor puwa nga nagtangag sa plakang 7D-4645.

Ang shoulder bag nga kolor itom sa biktima nga dunay sulod nga pitaka, hulagway sa kapuyo niini, purse nga adunay sulod nga kapin P400 nga cash, mga ID ug ATM card, ug student permit, nabawi usab sa mga otoridad gikan sa suspetsado.

Si Alalim mibutyag sa Banat News nga sa sayo pa nakadawat sila og report nga si Balongag , giingong mipusil kang Abella sa tuong tiil sa dalaga, dihang nagdumili kini paghatag sa iyang bag.

Apan dihang giluklok na sa suspek ang pusil niini sa iyang hawak kay mosibat na, gidimalas kini kay mikalit lang og buto ang maong armas busa natapsingan ang iyang tuong paa.

Unya natiwasan pa gyud ang iyang pagkadimalas kay dihang mipauli na siya ngadto sa Talisay, nasugatan niya ang checkpoint sa kapolisan ug dihang gipahunong siya, nasigpatan sa mga otoridad ang nagkadugo niyang paa.

Dihang ilang gisukit, nangatarungan kining nasabod siya sa kagingking hinungdan nga nawatas ang iyang paa, apan ang mga polis nga nasayod na sa nahitabo igo lang naminaw sa iyang pangatarungan ug gihatod dayon ngadto sa tambalanan. Human siya tambali sa doktor sa Cebu City Medical Center, gidala dayon siya pagbalik ngadto sa dakbayan sa Talisay ug gibalhog sa prisohan aron makapahuway siya sa paa niyang natusak sa bala sa iyang armas.

Sa pagkakaron nagpaabot nalang siya sa tukmang kiha nga isang-at batok kaniya.

Sa laing bahin, usa ka lalaking giingong nagpabuto og armas de fuego , nasikop sa mga tanod sa barangay Lawaan 3, dakbayan sa Talisay kagahapon sa kaadlawon.

 Ang suspetsado nailhan nga si Gleen Abendan, 36, nga taga barangay Candulawan sa maong dakbayan. Ang tanod nga nakasikop kaniya mao sila si Rey Empeynado, 36, Socrates Echavez, 48, Jessie Bacacao, 42, ug Luis Echavez, 52. Nasakmit gikan kang Abendan ang duha ka .38 kalibreng revolver diin usa niini adunay duha ka buhing bala.

Si Abendan nagtingkagol karon sa Talisay City detention samtang gipasakaan na kini sa kasong illegal possession of firearms. – BANAT NEWS