CEBU, Philippines - Lakip sa pa-imbestigahan karong adlaw'ng Martes sunod semana mao si Bokal Juan Bolo sa Provincial Ethics Committee sumala pang Bise Gobernador Gregorio Sanchez kini may labot sa Balili deal. Matud pa ni Sanchez nga may mipadayag kanilang moduso og complaint sulod karong semanaha ngadto sa Hunta Probinsiyal batok kang Bolo tungod sa pagduda sa kalambigitan niini sa kontrobersiyal nga pagkapalit sa Kapitolyo sa lote sa pamilyang Balili nga nalubog na diay sa tubig dagat.
Sigon pa ni Sanchez nga iya nang nasultihan ang chairman sa Provincial Ethics Committee nga si Bokal Alfred Francis Ouano ug pipila ka mga miyembro sa provincial board nga ang mao unyang reklamo mipasa na lamang ngadto sa Committee of the Whole ug maoy mo-imbestigar kang Bolo.
Si Sanchez nagkanayon nga usa sa masentro unya sa imbestigasyon mao ang conflict of interest ni Bolo tungod sa pagpangunay niini sa paghikay sa mga papeles aron madali ang pagbayad sa Kapitolyo sa maong lote. Usa sa buot nilang sutaon og giunsa ni Bolo pagpapirma ni Governor Gobernador Garcia ang check payments sa lote sa Balili sa Abril 21, 2008 bisan og ang resolusyon nga naghatag provincial board og authorization ni Garcia napasar sa Abril 24, 2008. Samtang si Bokal Victor Maambong mitumbok nga si Bolo migamit sa ngalan ni Garcia aron molihok dayon ang Provincial Appraisal Committee pabor sa pagpalit sa maong lote.
Niadtong adlaw'ng Lunes mitungha ang administrador sa mga Balili nga si Atty. Romeo Balili ug mipasalig og kooperasyon sa imbestigasyon ug mipahibalong wala pa gyud magastos ang gibayad nga P98 milyones sa Kapitolyo sa maong luna gawas lang sa nakuhang brokers fee, relocation ug gain tax.
Si Maambong miangkon niadto pang 2006 nagsugod ang negosasyon ug sa miaging tuig lang kini nakumpleto, apan walay kasayuran ang gobernador nga bugtong si Bolo lang nga maoy kanhi tsirman sa Provincial and Municipal Properties maoy mipreparar sa memorandum of agreement ug sa deed of sale nga wala moagi sa provincial attorney’s office.
Kabahin sa MOA signing niadtong Abril 21, 2008 gikahibulong usab sa mga opisyal ang pagkapirma niini sanglit giingong wala dinhi si Garcia nianang maong petsa tungod kay tua kini sa Guam, hinuon ang gobernador mibutyag nga nagsalig siya niadto sa awtoridad nga gihatag niya sa Hunta niana pang buwan sa Enero. (Chester Abadilla) (BANAT NEWS)