2 ka anti-crime volunteer patay didto's Balamban

CEBU, Philippines - Duha ka mga sakop sa Civilian Volunteer Organization sa lungsod sa Balamban   gipamatay niadtong milabay’ng Domingo sa managlahing barangay sa maong lungsod.

Niadtong Domingo sa buntag, gipusil patay si Eric Baculi Villaveles, 27, samtang nag-atang og kasakyang habal-habal sa sitio Checkpoint barangay Lamesa sakop sa maong lungsod niadtong Domingo sa alas 8:30 sa buntag.

Matud pa ni PO2 Jose Baldecasa sa Balamban Police Station sa dihang nahinabi sa Banat News ang biktima aktibong miyembro sa CVO nga maoy responsable sa pagkadiskobre sa pipila na ka mga plantasyon sa marijuana sa bukirang bahin sa maong lungsod.

Gidugang ni PO2 Baldecasa nga sa wala pa mamatay ang biktima gitug-an sa amahan niini nga si Librado Villaveles, makadaghang higayon na kining nakadawat og mga pagpanghulga human sa aktibong paghatag niini og impormasyon sa kapolisan sa mga illegal nga kalihukan sama sa pagpananom og marijuana sa ilang lungsod.

Atol sa gihimong pagsukit-sukit sa kapulisan sa amahan sa biktima nga si Librado ang biktima paingon na unta sa lungsod dihang kalit gipusil sa wala mailhing mga lalaki.

Matud pa nakaangkon og daghang samad pinusilan sa nagkalain-laing bahin sa lawas ang biktima ug duna pay mga samad dinunggaban nga hinungdan sa iyang kamatayon ug wala na madala pa sa tambalanan.

Samtang usa ka mag-uuma nga giingong sakop gihapon sa CVO   gipusil patay samtang nagkalingaw og tan-aw sa telebisyon sulod sa pinuy-anan niini kauban ang iyang asawa ug mga anak sa bukirang bahin sa sitio Malingin barangay Liki lungsod sa Balamban niadtong Domingo sa alas 8:00 sa gabii.

Ang biktima mao si Nestor Bacus Pacquiao, 27, samtang ang suspek wala pa mailhi sa kapulisan sa paghimo ning balita.

Matud pa ni PO2 Jose Baldecasa sa Balamban Police Station sa dihang nahinabi sa Banat News diha sa gawas nga bahin sa panimalay sa biktima ang mamumuno ug mipasulod sa sumbohan sa armas sa bungbong nga kawayan ug gipusil lima ka higayon ang biktima nga naglingkod duol sa bungbong nga nakatalikod niadtong tungura.

Naputos sa samad pinusilan sa bukobuko sa biktima ug patay kini diha -diha ug wala na madala pa sa tambalanan.

Ang kapulisan nga nirespondi sa crime scene igo nalang naka- recover og tulo ka basiyo sa kalibre .45 ug laing tulo ka buhing bala gikan gihapon sa susamang kalibre sa armas. Gisusi pa usab ang report nga sakop kini sa CVO.

Samtang si Chief Supt. Lani-O Neres ang director sa Police Regional Office (PRO-7) ang nimando na kang Sr. Supt. Jesus Gaquing director sa kapulisan sa lalawigan sa Sugbu nga mopahigayon og imbestigasyon sa maong mga insidente. (Darrel Carumba ug Guam Logroño)   (BANAT NEWS)