Anak sa mama nag-tong its namatay

CEBU, Philippines - Usa ka upat pa ka buwang bata ang gikatahong namatay samtang gibantayan sa iyang 6-anyos nga gikadenahang maguwang samtang ang ilang inahan nagduwa og tong-its sa ilang silingan niadtong milabay'ng Miyerkules.

Ang maong report nakapaalarma sa mga opisyales sa dakbayan sa Sugbu hinungdan nga si City Health officer Fe Cabugao mimando og dinaliang imbestigasyon sa maong report.

Kini nahibaw-an lang dihang usa ka residente sa Talamban miadto sa ilang buhatan sa Cebu City Health Department aron mangayo og death certificate aron ilang mapalubong ang maong bata.

Ang maong residente gikatahong mitug-an sa mga health officers nga namatay ang bata samtang nag-tong-its ang mga ginikanan niini nianang tungura ug maguwang nga 6-anyos nga gipabantay gikadenahan usab aron di makabiya sa balay.

Tungod niini, ang Department of Social Welfare and Services sa dakbayan mipadala kang Charisma Rengquijo aron imbestigaran ang hitabo diha sa sitio Wakwak sa maong barangay, apan gikatahong wala niini maabti ang mga ginikanan kay tua sila sa sam-ang nagpalubong sa bata.

Ang Gender and Development section sa Talamban mao nay gitahasan sa DSWS sa pagpadayon sa imbestigasyon.

Si Alma Seno, sakop sa GAD sa Talamban gikatahong nakigkita na sa inahan sa bata nga si Divina Trana, 25, ug gipangutana kabahin sa maong report apan ang naulahi gikatahong kusganong mihimakak nga gibiyaan niya ang ilang anak ug gipabantayan sa 6-anyos nilang anak nga kinadenahan aron manugal sa silingan.

Sumala pa ni Seno, ang inahan nangangkong nanglaba siya nianang tungura pipila ka metros gikan sa ilang balay dihang namatay ang iyang anak. Gihimakak usab niyang gikadenahan ang 6-anyos niyang anak.

“Akong gipangutana ang 6-anyos nga bata, miingon man hinuon kini nga wala siya igaid adtong higayuna. Pero una kuno, dihay higayon nga gihigtan siya sa iyang papa aron dili makalakaw gikan sa balay,” sumala pang Seno.

Si Trana mipasabot   premature ang iyang anak ug giubo na kini sulod na sa lima ka adlaw maong iyaha kining gidala sa barangay health center nianang Miyerkules sa buntag apan walay doktor nga nakaatiman niini maong mipauli nalang siya.

Sumala pa niya pag-abot nila sa balay iyang gipakaon og cereal ang bata ug pinabukalang “gabon” tungod kay wala silay gatas niadtong tungura. Ang kapuyo ni Trana nga amahan sa maong bata nga si Antonio Campaner gikatahong usa usab ka polio victim ug nagtrabaho isip usa ka kusinero.

“Nahibulong nalang kuno ang maguwang (6-anyos) nga dili naman molihok ang iyang manghod dihang gihagwa-hagwa. Namatay na diay ni nga nagbuka ang mata,” pasabot pang Seno.

Si Rengquijo mitambag karon sa mga opisyales sa barangay sa Talamban ilabi na sa mga silingan sa bata nga ipasusi ang 6-anyos nga maguwang sa namatay tungod sa kabalakang basin dagmalan kini sa mga ginikanan tungod sa pagbutyag sa nahitabo sa iyang manghod ngadto sa mga awtoridad. - Report gikan sa The Freeman (BANAT NEWS)